Raki-tsarobidy miafina ao anaty saha

2010-12-11T14:44:00.007+02:00

Akon'ny andram-piainan'ny Postulantes

Faly tafaray ato amin'ity blog ity isika. Mahafaly anay Postulantes (Marie Clarisse sy Hoby) ny mizara amintsika ny andram-piainana nataonay: niara-niaina akaiky tamin'ireo masera. Nandritra ny roa volana no nanantanterahanay an'izany teto amin'ny librairie Md Poaly teto Analakely. Ny Postulat dia dingam-piofanana iray tsy maintsy lalovana raha te hanao masera Filles de St-Paul. Ka toy izao ny niainanay mirahavavy azy:

Hoby:Nisy akony teo amin'ny fiainam-panahiko ny andram-piainana nataoko tato amin'ny librairie, satria nitarika ahy hitondra am-bavaka mandrakariva ireo olona rehetra izay mihaona amiko. Tsapako fa ireny olona ireny no endrik'i Kristy ka noezahiko arak'izay mety ny nandray tsara an'izy ireny teny sy ny fanampiana ary ny fanomezana fanazavana ho an'izay mila izany. Koa resy lahatra tanteraka aho fa ny andrana nataoko tato amin'ny librairie no amaliako sahady ny antson'i Kristy ho ahy ho ato amin'ny fikambanan-dry masera Filles de St-Paul.

Marie Clarisse:Isaorako betsaka ny fikambanana nanome ahy ity fotoana nanaovako ny andram-piainana amin'ny asa sahanin'izy ireo ity, fa idrindra ny niaraha-niaina akaiky tamin'ireo masera. Anisan'ny zavatra nanaitra ahy, nandritra ny fotoana niasako tao amin'ny librairie ny fahatsapako fa maro ny olona no te hanandratra ny hasin'ny maha olona azy. Azoko notarafina tamin'ny alalan'ny karazam-panontaniana napetrak'izyireo izany. Anisan'ny tsapako ihany koa ny maha fianakaviana iray an'ireto masera ireto izay taratra amin'ny alalan'ny fiombonan'izy ireo.

Manentana antsika tanora izahay mirahavavy mba hanao izany andram-piainana izany aty amin'ny masera Filles de St-Paul

2010-11-28T17:36:00.002+02:00

Aza revon' ny ambany maso fa aoka ho avo fijery

Faly miarahaba antsika rehetra Tratr'izao taona vaovao, vanim-potoana iray lehibe eo amin'ny fiangonana izao
http://sandyfsp.blogspot.com/

2010-11-21T17:13:00.004+02:00

I Kristy Mpanjakan'izao tontolo izao

Io no fety lehibe ankalazain'ny Fiangonana amin'ny famaranana ny taona litorjika. Mpanjaka i Kristy, nandresy ny fahafatesana Izy, dia ilay fahafatesana mangeja izao tontolo izao. Miditra manjaka ao anatin'ny fiainantsika Izy mba hanafaka antsika amin'ny fanadevozan'ny karazam-pahafatesana ka hitarika antsika ho any amin'Andriamanitra Ray. Moa ve i Kristy no avelantsika hanjaka eo amin'ny fiainantsika sa zavatra hafa?

2010-11-04T20:20:00.005+02:00

Raha tianao!

Nivoaka indray ilay Gazety: "Raha tianao", laharana faha 66. Gazety entintsika tanora tovovavy mifandray amin'ny masera Filles de St-Paul, ifankalalana be be kokoa. Zavatra maro no hitantsika ao. Anisan'izany ny vaovaom-pikambanana niseho tato anatin'ny volana vitsivitsy, ny akon'ny camps vocationnel natao tamin'ny volana Aogositra, ny soa toavina toy ny firaisan-kina,... Santionan'ny voasoratra eo amin'ny pejin'ny soa toavina ny hoe: "Zava-nisy (izay efa somary miha malefaka ankehitriny) teo amin'ny fiarahamonina malagasy ny fanehoana fiombonana, fifanampiana, tsy ijerena havan'ny atsy na ny aroa. Mafy ny fatoram-pihavanana.[...] Ka hery sy fandrosoana, fandriam-pahalemana sy fiadanana, ... no vokatry ny firaisan-kina. Anisan'ny soatoavina miha very anefa izy io ankehitriny. Inona, araky ny hevitrao, no mety antony mahatonga izany?

2010-04-25T14:26:00.005+02:00

" Ny fijoroana ho vavolombelona

dia miteraka ao amin'ny hafa ny faniriana hamaly

ny antson'Andriamanitra "

Ny Alahady faha 4 amin'ny Paka dia atokan'ny fiangonana hivavahana ho an'ny fiantsoan'Andriamanitra. Matetika isika rehefa miresaka hoe antson'Andriamanitra dia mieritreritra avy hatrany ireo olona misafidy ny lalam-piainana pretra na relijiozy. Ny Krsitianina rehetra no antsoin'Andriamanitra mba hitory sy hiaina ny vaovao mahafaly araky ny seha-piainana misy azy avy. Miseho amin'ny endrika samihafa ny fomba entina manataneraka izany: fiainana maha pretra sy relijiozy, fanambadiana ary ao ireo mijanona ho tokan-tena hiasa eo anivon'ny fiangonana. Ny lohahevitra naroso ho dinihina dia ny hoe: "Ny fijoroana ho vavolombelona dia miteraka ao amin'ny hafa ny faniriana hamaly ny antson'Andriamanitra." Marina fa Andriamanitra no miantso. Noho izany ny antso dia fanomezana manokana avy any aminy kanefa matetika ireny no tsy mazava avy hatrany fa hazavain'ny vavaka sy ny oha-piainana asehon'ireo efa miaina izany.

Ity taona ity dia natokan'ny fiangonana ho taonan'ny Pretra. Ka amin'izao ankalazana ny andro iraisam-pirenena ivavahana ho an'ny fiantsoan'Andriamanitra izao dia andeha isika hivavaka manokana ho an'ny Pretra, ireo miofana hiroso amin'izany dingana izany ary indrindra ho an'ireo mbola eo an-dalam-pitadiavana izay lalana iantsoan'Andriamanitra azy. Mila vavaka avy amintsika tsirairay ireny Pretra ireny mba hirosoany lalindalina kokoa amin'ny fahamasinam-piainana hahafahany manampy antsika vahoakan'Andriamanitra ho masina ary indrindra hijoroany ho vavolombelona hitaona ny hafa hiroso amin'ny lalam-piainan'ny pretra araky ny iantsoan'Andriamanitra azy.

2010-04-07T04:18:00.014+02:00

Aleloia!

Tamin'ny nitsanganany ho velona i Kristy dia nanokatra tontolo vaovao ho antsika: tontolo anjakan'ny fitiavana, fifankatiavana sy ny fiadanana. Resiny ny herin'ny tontolon'ny fahafatesana. Io Kristy nandresy ny herin'ny ratsy io no banjinintsika. Ao anatin'ny fifandraisana lalina aminy no ahafahantsika mahatsapa fa nandresy ny ratsy tokoa Izy.

Koa miarahaba antsika rehetra tratry ny Paka!

Enga anie i Kristy nitsangan-kovelona

no hameno ny fiainantsika

2010-03-29T06:16:00.002+02:00

Ny 28 martsa no nankalazaina ny andron'ny tanora eran-tany. Ny lohahevitra naroson'ny Papa ray masina hodinihina dia ny hoe: " Ry Mpampianatra tsara ô! Inona no ataoko hahazoako ny fiainana mandrakizay?" ( Mk 10, 17 )

Ho an'ny diôsezin'Antananarivo, ny fankalazana an'izany dia nanomboka ny sabotsy 27 martsa. Nisy ny hetsika maro notanterahina. Ny alahady maraina kosa, talohan'ny hanombohan'ny Sorona Masina, dia nanome ny fampianarana izay nifantoka indrindra tamin'io lohahevitra io ny Eveka. Nantitrateriny tamin'izany fa eo am-pelantanan'ny tanora ny ho avin'ny fiangonana sy ny firenena. Mila miezaka, noho izany, hitombo eo amin'ny fiainana ny finoana.

Indro atolotra antsika tanora ny apahany amin'izany hafatry ny Papa ray masina izany: " Mila anareo izahay! Ireo ao anatin'ny hatanorana ankehitriny dia tsy maintsy misedra olana maro avy amin'ny tsy fananana asa, tsy fisian'ny ohatra sy ny tanjom-piainana azo antoka, fa indrindra ny lalan-kizorana mazava ho an'ny ho avy. (...) Na dia eo aza anefa izany dia aza mety ho kivy, aza lavina ireo nofinofinareo. Ampiroboroboy ao am-ponareo ny firahalahiana, ny fahamarinana sy ny fiadanana. Eo an-tananareo ny ho avy. (...) Mikeleza aina ianareo hanorina ny ho avinareo."

Eo am-pelantanantsika tanora tokoa ny ho avy. Ho anay ato anatin'ny ekipan'ny rakitsarobidy dia mirary fahombiazana ho anareo eo am-panarahana an'i Kristy izay toky ho an'ny ho avy.

2010-03-07T14:03:00.002+02:00

Ny fifadian-kanina sy ny tenin'Andriamanitra.

Mbola ato anatin'ny vanim-potoan'ny karemy isika izao. Fotoana izay hitalahoana ny famindram-pon'Andriamanitra amin'ny alalan'ny fivavahana ny famehezan-tena ary asa fiantrana .

Ny fifadian-kanina dia fitaovana aroson'ny Fiangonana italahoana ny famindram-pon'Andriamanitra sy anehoana ny fanenena amin' ny fahotana vita. Voamarina izany ao amin'ny tantaran'i Davida izay nangataka ny famindram-pon' Andriamanitra tamin'ny ratsy nataony ary nivalo tamin'ny alalan'ny fifadian-kanina : (Salamo34,13 ary Boky faharoan'ny Mpanjaka12,16).

Ry Jodita sy Estera dia nahazo ny fitahian'Andriamanitra hamelezany ny fahavalon'ny fireneny ary nandresy azy tamin'ny alalan'ny fifadian-kanina(Jodita 8,6 Estera 15,2 ). Hita araka izany fa atao ny fifadian-kanina rehefa hangataka fahasoavana manokana amin'Andriamanitra.

Ao amin'ny Matio 4,2 dia hitantsika i Jesoa mifady hanina efapolo andro sy efapolo alina rahefa hanombola ny fitoriana ny Vaovao Mahafaly.

Ireo Kristianina voalohany toy i Paoly sy Barnabe ihany koa dia nivavaka sy nifady hanina vao nanendry pretra.

Araka ireo ny tenin'Andriamanitra dia fitaovana mahomby tokoa ny fifadian-kanina. Koa manentana antsika ary hanao izany am-pinoana sy fitiavana isakin'ny Zoma sy ny Zoma Masina.

2010-02-27T13:44:00.006+02:00

Ny fotoan'ny karemy dia anisan'ny fotoan-dehibe eo fiainantsika kristianina. Fotoanana natao hibanjinana be be kokoa ny fitiavan'Andriamanitra izay te hamonjy ny olon-drehetra. 40 andro no iainana ny karemy, 40 andro izorana makany amin'ny fankalazana ny fitsanganan-ko velona, 40 andro izorana ho any amin'ny fiainana. Mba hahatongavana any amin'ny fitsanganan-kovelona miaraka amin' i Kristy dia ilaina ny fihavaozana anaty, miara-maty aminy amin'ny fahotana mba hiara-mitsangana aminy indray. Ny karemy ary dia fotoana natao indrindra hiovana, fiovana izay antsointsika amin'ny teny mahazatra hoe fibebahana vokatry ny fihaonana amin'Andriamanitra. Izay no antso ataon'ny fiangonana amintsika mandritra ity karemy ity. Samia ary mahay manararaotra ity fotoan-dehibe ity amin'ny alalan'ny fifadian-kanina, fanaovana asa soa ary mivavaka be be kokoa.

2010-02-02T19:27:00.004+02:00

o2 Febroary:

Nanolorana ny Tompo sady fetin'ny Jiro.

Andro natokan'ny Fiangonana ho an'ireo olom-boatokana.

Iza ireo olom-boatokana?
Tany am-piandohana, araka ny Testamenta Taloha dia ny vahoaka Jody no nofidin'Andriamanitra ary natokany ho an'ny tenany. Ankehitriny, ireo rehetra mankato ny Zanany sy ireo vita batemy rehetra no vahoaka atokan'Andriamanitra ho Azy. Ny fanokanan-tena ho an'Andriamanitra dia tanjona iombonan'ny kristianina rehetra.
Fetintsika tsirairay avy noho izany ny 02 Febroary fa kosa natokana ho fahatsiarovana ny fanoloran-tenan'ireo nantsoin'Andriamanitra . Ny pretra sy ny relijiozy ireo nantsoin'Andriamanitra manokana ireo. Samy voatokana ho an'Andriamanitra avokoa na ny relijiozy na ny kristianina hafa fa ny làlana izorany ho amin'io tanjona io no mampiavaka azy ireo.

Iza ny relijiozy?

Ny relijiozy dia:

Ireo olona antsoin'Andriamanitra hanaraka azy akaiky kokoa.

Ny atao hoe relijiozy dia ireo izay mamaly io antsom-pitiavana io ka mahafoy ny tenany ; ny fiainanay manontolo mba hitiavany sy hanompoany an'Andriamanitra niantso azy io
Minia am-pahibemaso ho tokan-tena, tsy anam-bady; tsy anan-janaka; mandra-pahafaty ny reljiozy.
Ny tanjona dia mba ho an'ny Tompo irery; mba tsy hiahy afa-tsy ny raharahany mba tsy hitady afa-tsy izay mahafaly azy.

Ny masera Filles de St-Paul

2010-01-25T04:45:00.017+02:00

Ny masera Filles de St-Paul dia fanaka voafidin' izy Tompo, tahaka an'i Md Paoly, hitondra Azy eo amin'ny tontolo ankehitriny amin'ny alalan'ny fampiasana ny fitaovam-pifandraisana manaraka ny toetr'andro, manana fo mirehi-pitiavana an'Andriamanitra sy ny olona rehetra

Ny masera Filles de St-Paul dia miaina ny fiainany manontolo ao amin'Andriamanitra tahaka an'i Md Paoly, ary mampamiratra izany eo amin'ny manodidina azy.

Izao tontolo izao no fetra itondran' ny masera Filles de St-Paul ny Teny Fahamarinana.

Fanaka voafidy ho ahy io lehilahy io

2010-01-17T17:10:00.006+02:00

Ny 25 Janoary ny fiangonana dia mankalaza ny fibebahan'ny Md Paoly. Izahay masera Filles de St-Paul dia manana fifandraisana lalina amin'ny Md Paoly. Izy no mpiaro ny fikambanana, fakan-tahaka eo amin'ny fanarahan-dia an'i Krsity ary manoro hevitra amin'ny asa fitoriana ny Vaovao Mahafaly. Noho izany, miaraka amin'ny fiangonana manontaolo, izahay mankalaza io fety io. Ao anatin'io fibebahany io ny fiangonana no mankalaza be be kokoa ny fihaonan'i Paoly tamin'ny Kristy izay nanova tanteraka ny tontolony. Teo aloha dia izy no nataony ivon'ny fiainany. Izany hoe ny sitrapon'ny tenany no nomeny lanja be be kokoa: "Tamin'izay i Saoly dia tsy nihevitra afa-tsy ny handrahona sy hamono ny mpianatr'i Kristy ka nangataka taratasy tamin'ny lehiben'ny mpisorona izy ho an'ny sinagôgan' i Damasy mba hahafahany hitondra am-patorana ho any Jerosalema izay rehetra hitany manaraka an'i Kristy." Taorian'ny fihaonany tamin'i Kristy kosa dia nafoiny ny sitrapon'ny tenany fa ny an'i Kristy no nataony ivon'ny fiainany. Ny fametrahana an'i Kristy haka toerana tanteraka eo amin'ny fiainantsika no fibebahana andrasana amintsika kristianina izay akantsika tahaka an'i Md Paoly. Mpanenjika ny kristianina i Md Paoly teo aloha. Ankehitriny kosa dia lasa fanaka voafidin'i Kristy hampahafantatra azy eran'izao tontolo izao.

Ary ny Teny tonga Nofo

2009-12-20T12:23:00.006+02:00

Isaorana anie Andriamanitra,

Rain'i Jesoa Kristy Tompontsika,

izay nitsodrano antsika tao amin'i Kristy, amin'ny tsodrano rehetra ara-panahy any an-danitra,

sy nifidy antsika tao aminy talohan'ny nahariana izao tontolo izao

mba ho masina sy tsy manantsiny eo anatrehany isika (Ef 1, 3-4)

Izay tenin'i Md Paoly izay no entinay ato amin'ny ekipan'ny raki-tsarobidy

miarahaba antsika rehetra tratry ny Noely

ary

irariana taona vaovao feno fahombiazana

ho antsika.

2009-11-14T16:58:00.004+02:00

Ny 26 Novambra dia hankalaza ny faha -38 taona nahafatesan'i Mompera Alberione olontsambatra isika. Izy moa no angady nananana sy vy nahitana ny fikambanan'ny masera Filles de St Paul.
Amin'izao volana Novambra izay volana natokana ahatsiarovana sy ivavahana manokana ho an'ireo havantsika efa nodimandry izao dia hahatsiaro manokana an'i Mompera Alberione Olontsambatra isika.
Raha hitodiantsika kely ny tantaran'i Mompera dia: tamin' ny faramparan'ny taonjato faha- 19 izay niainany dia efa nisongadina sahady ny tanjaky ny seresera teo amin'ny fianan'ny zanak'olombelona. Nakadiry ny akony nefa tamin'izay dia tsy voafehy loatra ny fampiasana azy. Taitra noho io fisehoan-javatra io Mompera ka nanomboka teo no nitsiry tao am-pony ny hampiasana ity fitaovana sarobidy ity hitoriana ny Vaovao Mahafaly. Izay rehetra mahasoa sy mampivelatra ny olombelona rehetra no Vaovao Mahafaly tian'i Alberiona Olontsambatra haparitaka aminy alalan'ny serasera.
Mandrak'ankehitriny dia mbola mitana toerana lehibe eo fianan'izao tontolo izao ny fitaovam-pifandraisana amin'ny piarabelona.
Hisaotra an'Andriamanitra noho ireo ohatra tsara navelan'i Mompera Alberione amin'ny fampiasana tsara ity fitaovana isika.

Ireto misy hafatra vitsitsy avy amin'i mompera Alberione olontsambatra:

Tsy misy harena lehibe azo omena an'izao tontolo izao; mahantra sy feno avonavona; afa-tsy i Jesoa Kristy.

Na inona na inona ataonareo dia ataovy tsara.
Asa vita tsara sady haingana.

Tsy ny karazan'ny asa atao no manome lanja antsika

fa ny fanaovana azy am-pitiavana.

Manàna fiheverana mahitsy,

fo mahitsy ary fiainana mahitsy

eo anatrehan'Andriamanitra sy ny olona rehetra.

Aza mihevitra ny hanao zavatra

goavana fa manaova ny tsara amin'izay rehetra.

Ny tena fahafahana marina dia

ny fahaizana misafidy sy manatanteraka ny Tsara.

Izaho no Lalana, Fahamarinana ary Fiainana

2009-11-07T13:55:00.003+02:00

Banjinina eo amin'ny fiainam-panahinay Masera Fille de St Paul i Kristy Mpampianatra Lalana, Fahamarinana ary Fiainana. Koa miezaka isanandro izahay mba hampifanaraka ny fiainanay amin'ny fiainany ka ho afaka hilaza toa an'i Md Paoly hoe: "Tsy izaho intsony no velona fa i Kristy no velona ato amiko." Ny tanjona dia ny fahamasinana.

Nalaina tamin'ny lahatsoratra nosoratan'i Alexandra (Postulante Fille de st Paul) ao amin'ilay gazety kely "Raha Tianao" n° 62

Jesoa Mpampianatra

2009-10-25T16:54:00.007+02:00

Ny alahady farany amin'ny volana ôktôbra no ankalazanay fianakaviana Paolininanina ny fetin'i Jesoa Mpampianatra: Lalana, Fahamarinana ary Fiainana banjininay eo amin'ny fiainam-panahy. Ho anay masera Filles de St-Paul teto Antananarivo dia niarahana nankalaza tamin'ireo tanora maniry ho masera ka te hahafantatra anay Filles de St-Paul . Natomboka tamin'ny fihatahana masina ny maraina izay niresahana momba an'i "Jesoa Mpampianatra" ary nofaranana tamin'ny sorona Masina ny tolakandro.

I Jesoa tsy mba nampiasa boky na "document" hafa nentiny nampita fahalalana fa ny azy ny fiainany no nampianariny ary ny tanjona dia ny hahatonga io fiainany io ho lasa fiainantsika. Fampianarana mitarika makany amin'ny fiovam-piainana noho izany ny an'i Kristy.

2009-10-04T15:03:00.003+02:00

Mahaiza miala voly

Tanjon'ny fialam-boly:

Hanalana ny havizanana sy sorisory mandritra ny herinandro nodiavina;
hanovozana hery sy hamelombelomana ny fanahy amam-batana hiatrika ny herinandro vaovao; hafaliana sy fahatonian-tsaina

2009-10-04T14:57:00.005+02:00

Tsy manao "ampitso lava"

Ny fangatahana andro lava ny "aleo rahampitso" dia: mampitombo sy manamafy ny
hakamoana izay miteraka tsy fahombiazana.
izay tokony hatao anio dia tanteraho anio.
Soloy havitrihana ny hakamoana

2009-10-04T14:38:00.003+02:00

Ny lalivain'ny fiainana

Matokia an'Andriamanitra:
Ambarao azy:
ny fandaharam-potoanao, ny fanirianao.
Zarao Aminy: ny tebiteby aman'ahiahinao sy ny an'ireo mifanerasera aminao.
Ankino aminy ny olon-tianao.
Apetraho eo am-pelantanany koa: ny zavatra vitanao, ny fifandraisanao amin'ny hafa, ny fanantenanao.

Ianao tanora io sy ny serasera

2009-09-29T19:51:00.007+02:00

Ny tontolon'ny serasera dia anisan'ny maneho ny endriky ny fiaraha-monina ankehitriny. Ny tanora indrindra no milomano tanteraka ao anatin' izany (génération digitale). Anisan'ny fitaovana manana hery lehibe mamolavola ny toe-tsaina izy ireny koa manana adidy isika tanora hahay hisafidy. Maro ny zava-tsoa tovoizina avy amin'izy ireny fa maro ihany koa ny hevi-dratsy ampitainy. Amin'ny alalan'ny fampiasana ireny fitaovan-tserasera ireny, na izaho na ianao dia afaka ary manana adidy hanorinta tontolo tsaratsara hatrany. Hoy indrindra ny Papa tamin'ny hafany ho an'ny andro iraisam-pirenena ho an'ny serasera 2009: " Mipetraka aminareo tanora indrindra ny fitoriana ny Vaovao Mahafaly amin'izao kaontinanta digitale izao" Koa mahaiza ary misafidy sy mampita ny tsara ho anao sy ho an'ny namanao. Eo am-pelan-tananareo tanora ny tontolo hoavy tsaratsara kokoa.

Fanontanian'i Fitia

2009-08-09T17:06:00.007+02:00

Hoy Fitia nametraka hevitra:
Mahafinaritra ny mamaky ny andram-piainana nataon'ireo tanora. Mba tokony nolazaina hoe inona moa izany hoe mampiavaka ity fikambanana ity amin'ny fiainam-bavaka? Tanora toa inona no afaka manao ity andram-piainana ity? Matoa izany ireo tanora ireo nandany volana maromaro tao dia ao raha! Toa tsy mba manao fanasana ny tanora hafa izy ireo mba hanao izany andram-piainana izany sa ho azy ireo ihany ny zavatra soa toy izao? (cf. commentaire 21/07/09: "stage")

Hoy kosa izahay:

- Misaotra an'i Fitia nametraka hevitra. Ny mampiavaka an'ity fikambanana ity amin'ny fiainam-bavaka dia ny fiezahana manatratra ilay tenin'ny Md Paoly hoe "tsy izaho intsony no velona fa i Kristy no velona ato amiko" Gal 2, 20. Izany hoe ny an'i Md Paoly ny fiainany manontolo dia fifandraisana lalina tamin'i Jesoa: ny fomba fieritreretany, ny asa nataony, ny sitrapony,... nampifanarahiny tamin'ny an'i Jesoa avokoa. Izay fomba fifandraisan'i Md Paoly tamin'i Jesoa izay no noraisin'ny mpanorina ho fiainam-panahin'ny fikambanana. Amin'ny alalan'ny vavaka no ahatongavana amin'izay firaisan'aina tanteraka amin'i Kristy izay ka banjininay manokana i Jesoa Mpampianatra: Lalana sy Fahamarinana ary Fiainainana manaraka ny ohatra navelan'i Md Paoly, eo ambany fiarovan'i Masina Maria Mpanjakavavin' ny Apôstôly.

- Ny fanontaniana sisa dia efa voavaly ( cf. commentaire 21/07/09: "stage")

Mahafinaritra ny fiainana

2009-08-01T15:26:00.010+02:00

Famintinana ny fiainan’ny « stagiaire » nandritry ny taona 2008 - 2009

Androany no fotoana nofidianay
Hanoloranay hira iray

Izy ity dia natao mba hilazanay
Ny fiainanay hatrizay stage izay
Koa miangavy anareo hihaino ny tonon-kira
Amin’izay dia mba misy souvenir
Ahatsiarovanareo ny staginay teto
Feno kalokalo sy hirahira

Raha niala tany an-trano moa izahay hanao stage
Dia tsy nihevitra hanao vazivazy
Saingy ny ela hono letsy maharay roa
Ka lasa nifankahazo am-po
Indreo ny Masera, aspirantes, stagiaires
Fa tena nifanerasera
Ka faly aok’izany izahay stagiaires
Fa poince ry ireto ‘ty ny afera

Fiv :Dia ny hirahiranay hiraina
Raha mahatsiarotsiaro nareo
Ny soa niarahana tadidio
Fa i Jesoa no nahatonga an’io

Raha ny fiainanay teto aloha dia tena nilay
Ka indro fa ho tsiahivinay
Ny fianarana, ny vavaka, ny asa, ny kilalao
Dia tena tsy naha te handao
Hitanay taiza moa izay méditation
Indrindra fa ny adoration
Nanampy izany ny récollection
Ary dia teo koa ny confession

Raha ny apostolà indray no holazainay
Dia maro ny zavatra hainay
Ka ampahany ihany no hambaranay
Izay tena nahazatra anay
Pliage, assemblage sy ny agrafage
Ireny no nampitana ny message
Rehefa vita dia nalefa any amin’ny librairie
Ka hita fa be mpankafy

Raha ny fiaraha-miaina no andeha hotantaraina
Tsy dia maro ny ratsy holazaina
Ka ampahany amin’izany izay tena nilay
Dia teo ny fitaomana kitay
Teo ny portière sy ny nettoyage
Hatramin’izao tsy hay izay namaky vazy
Vao novidiana koa ny débouchage
Avy hatrany dia tapaka ho azy

Maro ny zavatra izay simbanay
Ka indro fa ifonanay
Nisy ny nisantatra ny famakiam-bilia
Vao nanomboka ity stage ity
Ary koa ny baolina sy boaty tsakay
Izay potika tsy nisy voaray
Koa mangataka ny famelanareo
Dia ho faly zahay rehefa mody avy eo

Raha ny fahaizanay vollet no hojerena
Dia hita fa tena nahasorena
Niezaka hatrany ihany izahay
Ka indro fa nandroso nihanahay
Ka ankehitriny izahay dia handeha hody
Satria ny service efa tody
Koa isaoranay anareo tsy an-kanavaka
Sady mbola hoentinay am-bavaka

Ny fiaranana mivoaka aloha tena nilamina
Ka tena tsy misy kianina
Ny fandehanan-tongotra dia tena nahazatra
Ny fotoana izay henjana dia tratra
Maro ireo toerana manan-tantara sy malaza
Mahamasina, 13 May, Tsimbazaza
Ka maromaroa ihany ny tahak’izany
Fa ataontsika milay be hatrany

Raha asiana resaka kely koa ny amin’ny fianarana
Ny anglais, français tsy nanavanana
Ankehitriny anefa dia milaza izahay
Fa mba nisy koa ny fivoarana
Nahafantarana pays maro teto Afrika
Toan’i Rwanda, Libye, Congo
Ilay taranja iray izay ankafizinay
Dia tsy iza fa ny Histo-Geo

Tsy ambakan’izany koa ny fianarana baiboly
Ary amin’ny vie communautaire
Mamporisika anay mba hanana herim-po
Mba tsy ho voadona dia mianjera
Tsy ho hadinonay koa ny katesizin’ny Fiangonana
Ny famintinana azy aloha tsy nisy olana
Teo koa ny fandinihina ny filamatra valo
Paoly izay nitondra fampianarana maro

Nahasoa ihany koa ny fanaovana session
Nanampy anay amin’ny formation
Nampitombo aim-panahy koa ny récollection
Satria ilaina ny concentration
Zava-dehibe teo amin’ny fiainana
Ny fanaovana ny partage
Matotra ny resaka izay hifanaovana
Ka tsy mila manao vazivazy

Nanamarika ihany koa ny fiarahana miavaka
Ny misakafo eo ambony latabatra
Maneho avy hatrany ny tena fiombonana
Hany zahay ka tena mazoto homana
Mifankahita eo isika mianakavy
Na maraina izany na atoandro
Hany ka niodina in-telo monja fotsiny
Dia ritra ilay sakay feno voanjo

Eto am-pamaranana dia faly izahay
Hamarana ity tafanay
Izay no vitanay ka isaoranay anareo
Nihaino anay nanandram-peo
Voninahitra sy dera kosa ho an’Andriamanitra
Mba hitohy hatrany ny hasaramanitra
Ka andeha hody izahay hisaintsaina
Raha hiverina dia tsy halaindaina

Indro hisampana ary ny dianay
Ka veloma no apetrakay
Handeha hody izahay ho any amin’ny fianankaviana
Sy hihaona amin’ireo havatiana
Arivonimamo, Antsirabe, Tanetibe, Imito
Ny deparanay aloha dia amin’ny fito
Analalava, Fandriana sy Andravoahangy
Veloma dia samy mampamangy

Ny teninay farany dia ny hoe : « tongava isika tovovavy hanao izany andram-piainana izany. Ireo efa nambaranay anareo ireo ny akony avy aty aminay. »

STAGIAIRES: Arisoa, Nasah, Haingo, Voahirana, Olivà, Julie, Ranto, Vololona

Stage

2009-07-21T20:00:00.007+02:00

Anisan’ny dingam-piofanana arahina amin’ny firosoana ho masera Filles de St-Paul ny « stage ». Nahavita izany izy 8 mirahavavy ka indro harahintsika ny niainany azy ( izy 6 no mitantara ):

Vololona – Ambohibary Antsirabe: Hafaliana ho ahy no mizara aminao ny niainako ny andram-piainana nataoko tato amin’ny fikambanan’ny masera Filles de St-Paul nandritra ny 8 volana. Amin’ny ankapobeny dia azoko lazaina fa tena nahafinaritra tokoa. Eo amin’ny fiainam-bavaka dia hita fa manana ny mampiavaka azy izy ireo. Maro ny zavatra nianarako teo amin’ny asa manokana sahanin’izy ireo toy ny fanamboarana boky, sns… sady mba nandraisan’ny tena anjara tamin’ny fitoriana ny Vaovao Mahafaly. Momba ny fiaraha-miaina dia nanome hafaliana satria niainana tao anatin’ny firaisan-kina sy ny fifankatiavana. Tsy latsa-danja ny fialam-boly amin’ny lafiny maro izay tsy nampoiziko fa tena tsara be sy ny asa madinidinika isa-karazany. Maro tsy voatanisa ny fanabeazana sy ny fahalalana azoko nandritra izay 8 volana izay, nahafahana nandinika be be kokoa ny hoe aiza marina no lalana itarihan’Andriamanitra ahy. Tsy faty antoka e!

Voahirana - Antananarivo : Vita ny andram-piaianana nataoko nandritra ny 4 volana tato amin’ny masera Filles de St-Paul. Isaorana an’Andriamanitra lehibe izany. Nahafinaritra ny fiaraha-miainanay tato amin’ny trano fiofanana satria nomarihin’ny fiombonana sy ny fifankatiavana. Fiaraha-mientana hatrany no hita. Nahafinaritra ahy ihany koa ny nahafahako nifanerasera tamin’ireo tovovavy maro avy eto amin’ny lafy valon’ny Nosy. Ny tena hitako nisongadina tamin’ity andram-piainana nataoko ity dia fanabeazana nomen’ireo mpanabe izay mamolavola vatana, saina, fanahy ary ny fanomezana lanja ambonin’ny zavatra rehetra ny ara-panahy.

Oliva - Antsiranana: Nanao andram-piainana tato amin’ny fikambanan’ny masera Filles de St-Paul aho nandritra ny 5 volana. Nazava tamiko be be kokoa ny momba ny fiainan’izy ireo izay azoko fintinina hoe : vavaka, fianarana, asa, fiaraha-miaina miaraka amin’ny fialam-boly.
Faly aho nahavita an’izy ity. Betsaka ny zavatra nianarako sy niainako fa indrindra ny fahafantarana be be kokoa momba ny antson’Andriamanitra.

Julie - Imito: Naharitra 8 volana ny andram-piainana nataoko tato amin’ny fikambanan’ny masera Filles de St-Paul ho fahalalana momba ny fiainan’izy ireo. Raha fintinina dia nahafinaritra ahy ny nandalovako io fotoana io. Anisan’ny tsapako ho nisongadina ny fiombonana na teo amin’ny fanatontosana ny asa na teo amin’ny vavaka sy ny fiainana an-davanandro.

Nassah – Arivonimamo : Isaora i Jesoa sy ny masera Filles de St-Paul fa vita ny andram-piainana nataoko nandritra ny 7 volana. Maro ny zavatra nianarako toy ny fomba fivavaka, ny fiaraha-miaina ary ny asa mampiavaka ity fikambanan’ny masera ity. Nandritra io fotoana io ihany koa no nahalalako be be kokoa momba ny antson’Andriamanitra.
Na dia teo ary ny soa sy ny fahasoavana noratoviko dia tsy nilaozan’ny fahasarotana. Tao anatin’izany rehetra izany anefa dia tsapako ho niaina ny fiadanam-po sy hafaliana tanteraka aho

Haingo - Fandriana: Fotoana lavalava tokoa no niatrehako ny andram-piainana nataoko teto amin’ny fikambanan’ny masera Filles de St-Paul. Nandritra izany no nahitako ny fombam-piainan’izy ireo. Raha ny fiainana ara-panahy no ambara dia anisan’ny mampiavaka azy ireo ny fanaovany fandinihana sy fifampizarana ny tenin’Andriamanitra, fitsaohana ny sakramenta masina adin’iray isanandro, ny fihatahana masina isam-bolana. Eo amin’ny sehatry ny asa kosa dia mahafinaritra ahy ny manamboatra boky, ny mitety paroasy na sekoly mitondra ho an’ny olona ny vokatry ny asa. Misy fotoana ihany koa iarahanay milalao, miala voly, manao fety, mijery tele, mianatra, … izay tena mahafinaritra ahy tokoa.
Izany rehetra izany dia nataon’izy ireo ho fanahafana an’i Md Paoly amin’ny fanarahan-dia an’i Jesoa ka izany no tsy ahafoizako ny FSP.

2009-06-30T19:39:00.006+02:00

Isaorana Andriamanitra amin’izao famaranana ny taonan’i Md Paoly izao noho ireo karazam-pahasoavana maro nomeny tamin’ny alalan’io olomasina io. Maro ny hetsika nokarakaraina teto Madagasikara, tany amin’ny diosezy tsirairay, ho fampahafantarana an’i Md Paoly. Anisan’ny ezaka iray lehibe nandritra iny taon-jobily iny ny famoahan’ny edisiona Md Paoly, izay tantanan’ny masera Filles de St- Paul, boky 10 karazana fantatra ao anatin’ny tarika heo : « Filamatra » hanampiana ny kristianina hahafantatra be be kokoa an’i Md Paoly. Ny boky tsirairay dia mamelabelatra lohahevitra iray avy. Hitantsika amin’ny sary eto ambany ny karazany.
Ny taon-jobily fankalazana ny faha 2000 taona nahaterahany no nifarana fa ny harem-panahy navelany kosa tsy ho tapitra na oviana na oviana izay voavelabelatra ao anatin’ireo boky tsirairay ireo.

Izy rehetra ireo dia hitantsika ao amin’ny librairie Md Paoly.

Safidy

2009-06-02T20:32:00.026+02:00

Vita soa aman-tsara ny fihaonan'ireo tovovavy te hahalala ny antson'Andriamanitra ho azy ka te hahafantatra bebe kokoa ny fikambanan'ny masera Filles de St-Paul. Nisy 6 mirahavavy izy ireo avy amin'ny faritra samihafa manodidina an'ny Fandriana. Naharitra 3 andro ny fihaonana. Ny andro voalohany dia niresaka momba ny antson'Andriamanitra amin'ny ankapobeny izay notohizana tamin'ny fampahafantarana azy ireo ny masera Filles de St-Paul. Ny andro manaraka kosa dia nanao fihatahana masina izay fotoana fahanginana hahafahana mandinika samy irery momba an'io antso io. Ny andro fahatelo dia ny fanaovana jery todika ireo andro roa voalohany, torohevitra ary nofaranana tamin'ny korana izay samy nandraisan'ny tsirairay anjara ka nanehoany ny talentany avy.
Tsapa hoe liana tanteraka izy ireo ary hita soritra teny aminy ny fitiavana te hahalala ny antson'Andriamanitra ho azy ireo.
Tsy mitsahatra miantso Andriamanitra fa anjarantsika ny mamantatra ka mamaly izany antsony izany.

Aoka isika hivavaka

2009-05-19T21:15:00.005+02:00

Ry Jesoa Tompo, Ianao ihany no nilaza hoe:
"Be ny vokatra fa ny mpijinja no vitsy";
dia hoy lanao nanampy:
"Angataho àry ny Tompom-bokatra haniraka mpiasa amin'ny sahany".
Koa amim-po manaiky anao sady sitrakao
no ivavahanay ho an'ny Fiantsoan'Andriamanitra.
Henoy, ry Andriamanitray ny fitalahoanay aminao:
omeo pretra masina sy maro izahay
hitory ny evanjelinao sy hizara ny fahasoavanao;
omeo relijiozy vonona sy mahafoy tena ny Eglizinao
ho vavolombelon'ny fitiavanao hatrany amin'ny fara vazantany;
omeo apostoly lahika vonona hamonjy ny namana izahay:
hampamiratra ny toe-panahy kristianina eran'ny tany rehetra:
amin'ny fitiavam-bavaka,
amin'ny fitiava-namana,
amin'ny fandeferana sy herim-panahy,
amin'ny asa sahanina,
hampibaribary ny toe-tsainao Kristy mamelona azy.
Mba fidio eto afovoanay izy ireo:
amin'ny fiangonanay,
amin'ny sekolinay,
amin'ny fianakavianay.
Tohano izahay mba hahay hanampy,
araka ny herinay rehetra,
ireo izay antsoinao ka manaraka Anao amin-kerim-po sy fitokiana,
mba ho tonga ny Fanjakanao.
Miaraka amin'i Masina Maria Virjiny
sy ireo olomasina rehetra razanay izahay
no mitalaho izany aminao.
Amen.

Miandry anao Izy

2009-05-08T19:50:00.013+02:00

2009-04-11T12:54:00.009+02:00

"Ary raha tsy nitsangana tamin'ny maty i Kristy, dia foana ny finoanareo."(1Kor 15, 17)

Io tenin'i Md Paoly io no entinay iarahabana antsika rehetra tratr'izao fetin'ny Paka izao.
Ny fitsanganan'i Kristy tamin'ny maty no fototry ny finoana maha kristianina, maneho ny fandresena ny fahafatesana vokatry ny fahotana, indrindra manokatra ho an'ny olombelona ny hafenoan'ny fiainana ao amin'Andriamanidtra. Fotoana lehibe amin'ny maha kristianina noho izany ny Paka. Tsy tokony havela handalo fotsiny fa ibanjinana ny fandresena ilay fahotana efa niara- nalevina tamin'i Kristy. Ny fijaliana sy ny fahafatesana dia tsy tompon'ny teny farany eo amin'ny fiainana maha kristianina fa lalana mampita any amin'ny fiainam-baovao . Ny fiainana ny misterin'ny Paka noho izany dia mandalo fahafatesana amin'ny fahotana mba haha tongavana amin'ilay fahavelomana ao amin'i Kristy.
Koa samia ary miezaka.
Hanjaka ao am-pontsika anie ny fiadanan'i Kristy tafa-tsangan-kovelona

Andron'ny tanora era-tany 2009

2009-04-01T20:13:00.006+02:00

Andriamanitra velona no nametrahanay ny fanantenanay (1Tim4,10)

Io no lohahevitra naroson'ny Papa Ray Masina ho dinihina amin'ny fankalazana ny andron'ny tanora era-tany.
Ivon'ny fiainan'ny olombelona ny fanantenana. Miavaka izany eo amin'ny tanora. Ao amin'ny fahatanorana mantsy no ametrahana ny safidy fototra ho amin'ny fiainana manontolo. Tsy ampy hanorenana ilay fanantenana tadiavin'ny fanahin'ny olombelona anefa ny harena sy ny hatsaran-toetra. Andriamanitra irery no fanantenana marina.
Mahakasika ny taranaka ankehitriny ny sedran'ny fanantenana noho ny fiarahamonina tsy mitombina sy tsy misy soa toavina ianteherana ka toa manery azy hiatrika zavatra mihoatra ny heriny. Noho izany dia mamporisika antsika tanora ny Papa ho iraky ny fitiavan'Andriamanitra afaka hanorina ho avy feno fanantenana ho an'ny olombelona. I Md Paoly dia apôstôly vavolombelon'ny fanantenana ka amin'izao taona natokana hankalazana ny faha 2000 taona nahaterahany izao dia miaraka aminy isika ho tonga vavolombelona azo antoka ho an'ny fanantenana kristianina. Banjino sy antsoy i Masina Maria ilay renin'ny fanantenana, mitarika ny diantsika.

Iza moa ny masera Filles de St-Paul?

2009-03-16T20:19:00.012+02:00

Fikambanan-drelijiozy misionera, voaantso sy voatokana ho an'Andriamanitra ary voairaka hitory ny Vaovao Mahafaly sy hampivelatra ny olona amin'ny alalan'ny boky, gazety, radio, video, television, internet...
Manolotra ny fiainana manontolo ho an'Andriamanitra izahay hahafahanay mitondra an'i Kristy amin'ny olona rehetra. Ho anay eto Madagasikara, ny varotra fampisehoana boky no mbola fitaovana ifantohanay be be kokoa anaparitahana ny tenin'Andriamanitra sy anabeazana ny olona.
I Mômpera Alberione no nanorina ity fikambanana ity izay niarahany niasa akaiky tamin'i Masera Tecla Merlo.
Raha lazaina amin'ny teny fohy ny fiainam-panahin'ny masera Filles de St-Paul dia toy izao manaraka izao:
- Mivelona manontolo ny Evanjelin'i Jesoa Mpampianatra Lalana sy Fahamarinana ary Fiainana
-Ny Eokaristia sy ny tenin'Andriamanitra ary ny ankohonam-piainana no anovozana ny hazavana sy ny hery ho entina miaina ny fiantsoana anay.
- I Md Paoly no ray mpiaro sy fakan-tahaka amin'ny fiombonam-piainana amin'i Jesoa Kristy sy amin'ny fitoriana ny Vaovao Mahafaly. Eo ambany fiarovan'i Masina Maria Mpanjakavavin'ny apôstôly no anatanterahana izany